കോട്ടയം: ചങ്ങനാശേരി അതിരൂപതയിലെ യുവജന സംഘടനകളായ ലിറ്റില്‍ ഫ്‌ളവര്‍ യുവദീപ്‌തി -എസ്‌.എം.വൈ.എം ഏര്‍പ്പെടുത്തിയ കേരളത്തിലെ മികച്ച സാമൂഹിക പ്രവര്‍ത്തകര്‍ക്കുള്ള ഫാ. റോയി മുളകുപാടം സ്‌മാരക ഒന്‍പതാമത്‌ “സമര്‍പ്പിതന്‍” അവാര്‍ഡിന്‌ ഡോ. മേരി കളപ്പുരയ്‌ക്കല്‍ അര്‍ഹയായി. 10,001 രൂപയും ഫലകവും അടങ്ങിയതാണ്‌ അവാര്‍ഡ്‌. കാരിത്താസ്‌ സെക്കുലര്‍ ഇന്‍സ്റ്റിറ്റിയൂട്ട്‌ പ്രഥമാംഗവും കാരിത്താസ്‌ പാലിയേറ്റീവ്‌ കെയര്‍ മേധാവിയും, പയ്യാവൂര്‍ മേഴ്‌സി ഹോസ്‌പിറ്റല്‍ സ്ഥാപകയുമാണ്‌ ഡോ. മേരി കളപ്പുരയ്‌ക്കല്‍. 50 വര്‍ഷത്തിലേറെയായി ഡോക്‌ടര്‍ എന്ന നിലയില്‍ മലബാറിലെ ആരോഗ്യ, സാമൂഹ്യരംഗത്തും കേരളത്തിലെ പാലിയേറ്റീവ്‌ കെയര്‍, ജീവകാരുണ്യരംഗത്തും, സഭയുടെ വളര്‍ച്ചയ്‌ക്കും നല്‌കിയ നിസ്വാര്‍ഥ സേവനം കണക്കിലെടുത്താണ്‌ അവാര്‍ഡ്‌. കടുവാക്കുളത്തു നടന്ന ചടങ്ങില്‍ എം.സി.ബി.എസ്‌ എമ്മാവൂസ്‌ പ്രൊവിന്‍ഷ്യല്‍ സുപ്പീരിയര്‍ റവ. ഫാ. ഡൊമിനിക്‌ മുണ്ടാട്ട്‌ അവാര്‍ഡ്‌ സമ്മാനിച്ചു.
