knanayapathram 
മെൽബൺ സെന്റ് മേരിസ് ക്നാനായ കത്തോലിക്കാ ഇടവകയുടെ പത്താം വാർഷികാഘോഷങ്ങളുടെ ഭാഗമായി, മെൽബണിലെ എല്ലാ ക്നാനായ ഇടവകാംഗങ്ങളെയും കോർത്തിണക്കിക്കൊണ്ട് , ഒരു ആത്മീയ യാത്ര, “ഒരു മരിയൻ കുടുംബയാത്ര ” സംഘടിപ്പിക്കുന്നു. പരിശുദ്ധ അമ്മ എന്റെ ഭവനത്തിൽ, മെൽബൺ ക്നാനായ ഇടവക അമ്മയോടൊപ്പം, ഒരു ദിവസം അമ്മയ്ക്കായ് എന്നീ ആശയങ്ങൾ ഉൾപ്പെടുത്തിക്കൊണ്ടാണ് ഈ ഒരു മരിയൻ കുടുംബയാത്ര സംഘടിപ്പിക്കുന്നത്.
ഈ യാത്രയുടെ ഔദ്യോഗികമായ ഉദ്ഘാടനം, കോട്ടയം അതിരൂപതാ ആസ്ഥാനമായ കോട്ടയം ക്രിസ്തുരാജാ ക്നാനായ കത്തോലിക്കാ കത്തീഡ്രൽ പള്ളിയങ്കണത്തിൽ വെച്ച്, ഡിസംബർ 27ആം തിയതി ചൊവ്വാഴ്ച 3 മണിയ്ക്ക്, കോട്ടയം അതിരൂപതാധ്യക്ഷൻ, അഭിവന്ദ്യ മാർ മാത്യു മൂലക്കാട്ട് മെത്രാപ്പോലീത്താ നിർവഹിക്കുന്നു.
അഭിവന്ദ്യ മൂലക്കാട്ട് പിതാവ് വെഞ്ചരിച്ചു ആശീർവദിച്ചു നൽകുന്ന, മാതാവിന്റെ തിരുസ്വരൂപവും തിരിയും, മെൽബണിലെ എല്ലാ ക്നാനായ ഇടവകാംഗങ്ങളുടെയും ഭവനത്തിൽ, ഒരുദിവസമെങ്കിലും, പ്രർത്തനാനിർഭരമായി, സ്വികരിച്ചു, പ്രാർത്ഥിക്കുവാൻ സാധിക്കുന്ന രീതിയിലാണ് ഈ മരിയൻ കുടുംബയാത്ര വിഭാവനം ചെയ്തിരിക്കുന്നത്.
സജിമോൾ മാത്യു കളപ്പുരയ്ക്കൽ, സിന്ധു സൈമച്ചൻ ചാമക്കാലായിൽ എന്നിവർ കോർഡിനേറ്റർമാരായുള്ള കമ്മിറ്റിയുടെയും, പാരിഷ് കൗൺസിൽ അംഗങ്ങളുടെയും, കൂടാരയോഗം ഭാരവാഹികളുടെയും നേതൃത്വത്തിൽ റൂട്ട് മാപ്പ് തയ്യാറാക്കി വരുന്നു.
കഴിഞ്ഞ പത്തുവർഷക്കാലമായി, ഈ ഇടവകയുടെ വളർച്ചയ്ക്കായി മാധ്യസ്ഥം വഹിച്ച, പരിശുദ്ധ അമ്മയുടെ അനുഗ്രഹം പ്രാപിക്കുവാനും, അമ്മയെ സ്വഭവനത്തിൽ സ്വീകരിക്കുവാനും, ഇടവക സമൂഹത്തിന് ലഭിക്കുന്ന അസുലഭനിമിഷമാണിതെന്നും, അഭിവന്ദ്യ മൂലക്കാട്ട് പിതാവ് വെഞ്ചരിച്ചു ആശീർവദിച്ചു അയയ്ക്കുന്ന ഈ രൂപവും തിരിയും, ഫെബ്രുവരിമാസം അഞ്ചാംതീയതി, സെന്റ് മാത്യൂസ് ഫോക്നർ പള്ളി കുർബാനമധ്യേ, ആദ്യ കുടുംബത്തിന് കൈമാറുമെന്നും, ഇടവക വികാരി ഫാ: പ്രിൻസ് തൈപ്പുരയിടത്തിൽ, പത്താം വാർഷികം ജനറൽ കൺവീനർ ഷിനോയ് മഞ്ഞാങ്കൽ എന്നിവർ അറിയിച്ചു.
