knanayapathram 
കോട്ടയം: സ്വയം തൊഴില് പരിശീലനത്തിന് അവസരമൊരുക്കി ഉപവരുമാന സാധ്യതകള്ക്ക് വഴിയൊരുക്കുക എന്ന ലക്ഷ്യത്തോടെ കോട്ടയം അതിരൂപതയുടെ സാമൂഹ്യ സേവന വിഭാഗമായ കോട്ടയം സോഷ്യല് സര്വ്വീസ് സൊസൈറ്റിയുടെ നേതൃത്വത്തില് കുടനിര്മ്മാണ പരിശീലനം സംഘടിപ്പിച്ചു. തെള്ളകം ചൈതന്യയില് സംഘടിപ്പിച്ച പരിശീലന പരിപാടിയുടെ ഉദ്ഘാടനം അതിരമ്പുഴ ഗ്രാമപഞ്ചായത്ത് വൈസ് പ്രസിഡന്റ് ആലീസ് ജോസഫ് നിര്വ്വഹിച്ചു. ഉഴവൂര് ഗ്രാമപഞ്ചായത്ത് മെമ്പറും മുന് പ്രസിഡന്റുമായ ജോണീസ് പി. സ്റ്റീഫന്, കോട്ടയം അഗ്രികള്ച്ചര് ഡെപ്യൂട്ടി ഡയറക്ടര് ഷേര്ളി സക്കറിയാസ്, കോട്ടയം സോഷ്യല് സര്വ്വീസ് സൊസൈറ്റി എക്സിക്യൂട്ടീവ് ഡയറക്ടര് ഫാ. സുനില് പെരുമാനൂര് എന്നിവര് ചടങ്ങില് സന്നിഹിതരായിരുന്നു. സ്വഭവനങ്ങളിലേയ്ക്കുള്ള കുടകള് മിതമായ നിരക്കില് നിര്മ്മിച്ചെടുക്കുവാന് അവസരമൊരുക്കുന്നതോടൊപ്പം കുട നിര്മ്മാണത്തിലൂടെ വരുമാനം കണ്ടെത്തുവാന് ആഗ്രഹിക്കുന്നവര്ക്ക് അതിനുള്ള അവസരം ഒരുക്കുക എന്ന ലക്ഷ്യത്തോടെയാണ് പരിശീലനം സംഘടിപ്പിച്ചത്. മാസ്റ്റര് ട്രെയിനര് ആന്സമ്മ ബിജു, സുജ റെജി എന്നിവര് പരിശീലന പരിപാടിക്ക് നേതൃത്വം നല്കി.
