സ്റ്റീഫൻ ചൊളളബേൽ (പി.ആർ.ഒ)
ചിക്കാഗോ : മോർട്ടൻ ഗ്രോവ് സെന്റ് മേരീസ് ക്നാനായ ദേവാലയത്തിലെ മതബോധന സ്കൂളിന്റെ ആഭിമുഖ്യത്തിൽ “ഉണ്ണിക്കൊരു ഊണ് “ പദ്ധതിക്കുവേണ്ടി കുട്ടികൾ സ്വരൂപിച്ച ഒന്നരലക്ഷം രൂപ കേരളത്തിലെ സഹായം അർഹിക്കുന്ന വിവിധ അഗതിമന്ദിരങ്ങളിലെ സഹോദരങ്ങൾക്ക് വിതരണം ചെയ്തു . പ്രളയ ദുരിതം അനുഭവിച്ച കുടുംബങ്ങൾക്ക് ആട് വിതരണം , വരൾച്ച നേരിട്ട പ്രദേശങ്ങളിൽ കുടിവെള്ള വിതരണം എന്നീ വിജയകരമായ പദ്ധതികൾക്ക് ശേഷമാണ് ക്രിസ്തുമസ് കാലത്തു അഗതിമന്ദിരങ്ങളിൽ സഹോദരങ്ങൾക്ക് ഭക്ഷണം നല്കുന്നതിനുവേണ്ടി ഉണ്ണിക്കൊരു ഊണ് പദ്ധതി നടപ്പിലാക്കിയത് . ക്രിസ്തുമസ് കാലത്തു അനാവശ്യ ചിലവുകൾ ഒഴിവാക്കിയാണ് ജീവകാരുണ്യ പ്രവർത്തനങ്ങൾക്കുവേണ്ടി കുട്ടികൾ പണം സ്വരൂപിച്ചത് . കോട്ടയത്തുള്ള നവജീവൻ ട്രസ്റ്റ് , പടമുഖത്തുള്ള സ്നേഹമന്ദിരം എന്നിവടങ്ങളിലാണ്‌ സഹായങ്ങൾ വിതരണം ചെയ്തത് . ഇടവക വികാരി ഫാ . തോമസ് മുളവനാൽ, അസിസ്റ്റന്റ് വികാരി ഫാ . ബിൻസ് ചേത്തലിൽ എന്നിവർ അഗതിമന്ദിരങ്ങളിൽ നേരിട്ടെത്തിയാണ് സഹായങ്ങൾ വിതരണം ചെയ്തത് . അനാവശ്യ ചിലവുകൾ ഒഴിവാക്കി , പണം സ്വരൂപിച്ച് , ചാരിറ്റി പ്രവർത്തനങ്ങൾ നടത്തുന്ന മതബോധന സ്കൂളിലെ കുട്ടികളുടെ വിശാലമനസ്കതയെ ഇടവക വികാരിമാർ അഭിനന്ദിച്ചു .കൈക്കാരൻമാരും അധ്യാപകരും സിസ്റ്റേഴ്‌സും പദ്ധതിക്കുവേണ്ടി പണം സ്വരൂപിക്കുവാൻ നേതൃത്വം നൽകി .
