കരിമീന്‍ പൊള്ളിച്ചത്

കരിമീന്‍ പൊള്ളിച്ചത്

ആവശ്യമുള്ള സാധനങ്ങള്‍
കരിമീന്‍ വലുത്-അഞ്ചെണ്ണം
മുളക്‌പൊടി-രണ്ട് ടീസ്പൂണ്‍
മഞ്ഞള്‍പ്പൊടി-കാല്‍ ടീസ്പൂണ്‍
ഗരം മസാല-കാല്‍ ടീസ്പൂണ്‍
കുരുമുളക്‌പൊടി-അര ടീസ്പൂണ്‍
ഉപ്പ്-ആവശ്യത്തിന്
കറിവേപ്പില-മൂന്നെണ്ണം
സവാള-നാല്
വെളിച്ചെണ്ണ-അര കപ്പ്
തയ്യാറാക്കുന്ന വിധം
ആദ്യം കരിമീനില്‍ പുരട്ടാനുള്ള മസാലയാണ് തയ്യാറാക്കേണ്ടത്. രണ്ട് ടേബിള്‍സ്പൂണ്‍ മുളക്‌പൊടി, കാല്‍ ടീസ്പൂണ്‍ മഞ്ഞള്‍പ്പൊടി, കാല്‍ ടീസ്പൂണ്‍ ഗരം മസാല, അരടീസ്പൂണ്‍ കുരുമുളക്‌പൊടി പാകത്തിന് ഉപ്പ് എന്നിവ കുറച്ച് വെള്ളത്തില്‍ മിക്‌സ് ചെയ്ത് പേസ്റ്റ് പരുവത്തിലുള്ള മസാലയാക്കുക. കരിമീന്‍ വൃത്തിയാക്കി , മസാല പിടിക്കാനായി കത്തി കൊണ്ട് വരകള്‍ ഇടുക. ശേഷം തയ്യാറാക്കി വച്ചിരിക്കുന്ന മസാല മീനില്‍ പുരട്ടുക. പൊള്ളിക്കുന്നതിനു മുമ്പായി മസാല പുരട്ടി കുറച്ചുനേരം വച്ചിരുന്നാല്‍ കൂടുതല്‍ രുചി ഉണ്ടാകും.
കരിമീന്‍ എണ്ണയില്‍ പകുതി വേവിക്കുക എന്നതാണ് അടുത്ത ഘട്ടം. അരക്കപ്പ് വെളിച്ചെണ്ണ ഫ്രയിങ്പാനില്‍ ഒഴിച്ച് ചൂടാക്കുക. ചൂടായ ശേഷം, മസാല പുരട്ടി വച്ചിരിക്കുന്ന കരിമീന്‍ എണ്ണയില്‍ രണ്ട് മിനിറ്റ് വീതം ഇരുവശങ്ങളും പകുതി വേവിക്കുക. വെന്ത ശേഷം കരിമീന്‍ ഒരു വാഴയില കഷ്ണത്തിലേയ്ക്ക് മാറ്റുക.
കരിമീന്‍ പൊള്ളിക്കുന്നതിനു വേണ്ട മസാല തയ്യാറാക്കുന്നതിന് കരിമീന്‍ വറുത്ത അതേ എണ്ണയില്‍ രണ്ട് സവാള കനം കുറച്ച് അരിഞ്ഞത് വേവിക്കുക. വെന്ത് കഴിഞ്ഞ ശേഷം നേരത്തെ തയ്യാറാക്കിവെച്ചിരിക്കുന്ന മസാലയും കുറച്ച് കറിവേപ്പിലയും കൂടി ചേര്‍ക്കുക. മസാല എണ്ണയില്‍ നിന്ന് അരിച്ചെടുക്കുക. ഈ മസാല കരിമീനിന്റെ ഇരുവശങ്ങളിലും നന്നായി പിടിപ്പിച്ച് വാഴയിലയില്‍ പൊതിഞ്ഞ് വെക്കുക.
കരിമീന്‍ പൊള്ളിക്കുകയാണ് അടുത്തതായി ചെയ്യേണ്ടത്. ഒരു തൂശനില തീയില്‍ വാട്ടിയെടുക്കുക. അതില്‍ വാഴയിലകഷ്ണത്തില്‍ പൊതിഞ്ഞ് വെച്ചിരിക്കുന്ന കരിമീന്‍ അങ്ങനെതന്നെ തൂശനിലയില്‍ വെച്ച് പൊതിഞ്ഞ് വാഴനാര് വാട്ടിയെടുത്തത് കൊണ്ട് കെട്ടുക. ഒരു ഫ്രയിങ് പാന്‍ അടുപ്പില്‍ വച്ച് ചൂടാകുമ്പോള്‍ കുറച്ച് പച്ചവെള്ളം തളിക്കുക. അതിലേയ്ക്ക് ഇലയില്‍ പൊതിഞ്ഞുവെച്ചിരിക്കുന്ന കരിമീന്‍ വച്ച് അതിനുമുകളിലായും കുറച്ച് വെള്ളം തളിക്കുക. ശേഷം അടച്ചുവെക്കുക. ഇടയ്ക്കിടയ്ക്ക് അടപ്പ് തുറന്ന് വെള്ളം വറ്റുന്നതനുസരിച്ച് വെള്ളം തളിച്ചുകൊടുക്കുക. ഇലയുടെ കളര്‍ ബ്രൌണ്‍ ആകുന്നതുവരെ ഇത്തരത്തില്‍ വേവിക്കുക.
 







ഇവിടെ കൊടുക്കുന്ന അഭിപ്രായങ്ങൾ ക്നാനായ പത്രതിന്റെതല്ല .സോഷ്യൽ നെറ്റ്‌വർക്ക് വഴി അഭിപ്രായങ്ങൾ എഴുതുകയും ചർച്ചയിൽ പങ്കെടുക്കുകയും ചെയ്യുന്നവർ അപകീർത്തികരമായോ അസഭ്യമോ അശ്ലീലമോ ആയ അഭിപ്രായങ്ങൾ പോസ്റ്റ്‌ ചെയ്യുന്നത് ശിക്ഷാർഹമാണ്.